Bugatti kompaniýasy täze Tourbillon giperkarynyň şahsylaşdyryş (personalizasiýa) tapgyrynyň başlanandygyny mälim etdi. Indi müşderiler konfigurator arkaly aýratyn sazlamalary saýlap bilerler. Şol bir wagtyň özünde, öndüriji «Equipe Pur Sang» atly ýörite opsion pakedi barada hem maglumat berdi. Bu pakediň esasy üýtgeşikligi – sekiz sany tüsse çykaryjy turbaly wyhlop ulgamy diýip, «Motor1» neşiri habar berýär.
Kompaniýa täze wyhlop ulgamynyň hereketlendirijiniň güýjüne ýa-da tizligine täsir edip-etmeýändigini anyk aýtmady. Sekiz sany tüsse çykaryjy turba yzygiderli keseligine ýerleşdirilen. Munuň üçin yzky bamper täzeden işlenip düzülen we täze diffuzor goşulan. Şeýle-de paket bilen bilelikde ulaldylan öňdäki splitter we üýtgedilen yzky spoýler hem berilýär.
«Equipe Pur Sang» pakedi diňe daşky görnüşe täsir etmeýär. Onuň düzümine täze teker diskleri hem girýär. Öňdäki tekerleriň ölçegi 20 dýuým, yzkylaryňky bolsa 21 dýuým. Bu diskleriň sag we çep tarap üçin aýratyn tehnologik aýratynlyklary bar. Bu aýratynlyklar howa akymyny dolandyrmaga kömek edýär. Hatda tekerleriň gözenekleýin gurluşy yzky radiatora barýan howanyň akymyny 8% artdyrýar.
Bu paket awtoulagyň içini hem üýtgedýär. Tourbillon-yň bu wersiýasy has ergonomiki oturgyçlar bilen enjamlaşdyrylar. Şeýle-de interýerde uglerod süýümli (karbon) bezegler we ýörite nagyşlar bolar. Pakediň bahasy resmi taýdan mälim edilmedi, emma insaýderleriň berýän maglumatlaryna görä, onuň bahasy 240 müň dollar töweregi bolar. Tourbillon giperkarynyň bahasy häzirki wagtda 3,8 million ýewrodan başlaýar. Bu eksklýuziw ulagdan bary-ýogy 250 sanysy öndüriler.
Bugatti-niň täze giperkary güýçli hereketlendirijili ulgama eýe. Ol 1800 at güýji bolan gibrid ulgam bilen üpjün edilýär. Bu ulgam atmosferaly V16 hereketlendirijiniň esasynda gurulýar. Bugatti ozal ulanylan W16 hereketlendirijisini önümçilikden aýyrmaga taýynlanýar. Sekiz litr möçberli bu hereketlendiriji iň soňky gezek W16 Mistral ýol rodsterleriniň önümçiliginde ulanylar. Bu ulaglaryň ilkinji nusgalary eýýäm fewral aýynyň ortalarynda müşderilere gowşuryldy.
