Mercedes-Benz kompaniýasy beýleki ykjam modelleriň bähbidine A-Class hetçbeginden we sedanyndan ýüz öwrer. Bu barada brendiň tehniki direktory Markus Şafer habar berdi diýip, Carscoops belleýär.
Ol kompaniýa bütin dünýäde, şol sanda Hytaýda we ABŞ-da ýöreýän modelleriň gerekdigini düşündirdi. Onuň aýtmagyna görä, hetçbek Ýewropada iň gowy görülýän kuzow stili, ýöne täze hetçbegiň döredilmegi we önümçiligi has köp serişde sarp ederdi. Şonuň üçin kompaniýa “kyn netijä” gelmeli boldy.
Ol 2022-nji ýylda üýtgeşmeleri başdan geçiren häzirki Mercedes-Benz A-Class-yň germaniýaly awtoöndürijiniň hatarynda şeýle at bilen iň soňky model boljakdygyny tassyklady. Awtomobiller 2026-njy ýyla çenli çykarylar, şondan soň önümçilikden aýrylar.
Umuman, kompaniýa ykjam modelleriň bir böleginden ýüz öwrer. Indi hatarda geçen hepde hödürlenen täze CLA, şeýle-de GLA we GLB ulaglarynyň täze nesilleri we kiçi G-Class galar.
A-Class awtomobillerinden başga-da, hatardan A35 AMG hetçbegi we B-Class ykjam miniwenleri ýiter. Şeýle-de, EQA we EQB doly elektrik krossowerleriniň täze GLA we GLB hatarlaryna birikdirilmegine garaşylýar, bu bolsa EQ adyny aýryp, bir umumy dizaýna getirer.
Belläp geçsek, A-Class 2022-nji ýylyň ahyrynda ABŞ-da we Kanadada satuwdan aýryldy, ýöne beýleki bazarlarda, şol sanda Ýewropada satylmagyny dowam etdirdi.
Mercedes-Benz A-Class 1997-nji ýyldan bäri çykarylýar. 2022-nji ýylda soňky dördünji nesil modeliniň täzelenen wersiýasy çykdy.
