Toyota kompaniýasy 2025-nji ýylda Toyota Circular Factory atly dünýäde awtoulaglary we akkumulýatorlary gaýtadan işleýän ilkinji zawodyny açar. Bu barada «The Engineer» ýazýar.
Täze zawod Beýik Britaniýanyň Býornaston şäherinde ýerleşer. Zawody güýzde işe girizmek meýilleşdirilýär. Bu taslama dünýäniň dürli künjeklerinde guruljak şuňa meňzeş zawodlaryň başlangyç nusgasy bolar. Maksat – awtoulag pudagynyň tebigata ýetirýän zyýanyny azaltmak we aýlawly ykdysadyýeti ösdürmek.
Täze zawodyň işi üç esasy ugra gönükdiriler:
- Birinji ugur – täzeden ulanmak üçin ýaramly şaýlary almak. Gaýtadan ulanyp boljak şaýlar hil barlagyndan geçiriler. Soňra olar Toyota-nyň resmi söwda kanallary arkaly satuwa çykarylar.
- Ikinji ugur – bölekleri abatlamak we gaýtadan işlemek. Bu bölümde akkumulýatorlar we tigirleriň diskleri ýaly şaýlar abatlanar. Olar täzeden ulanylmaga ýa-da gaýtadan işlenip, başga görnüşe öwrülmek üçin taýynlanar.
- Üçünji ugur – çig mallary gaýtadan işlemek. Alýuminiý, polat, mis we plastmassa gaýtadan işlenip, täze awtoulaglaryň önümçiliginde ulanylar. Netijede, tebigy baýlyklara bolan garaşlylyk azaldylar.
Başlangyç tapgyrda Toyota Circular Factory her ýylda 10 müň awtoulagy gaýtadan işlär. Bu işiň netijesinde, 120 müň sany ätiýaçlyk şaýy täzeden ulanylar.Şeýle-de 8,2 müň tonna polat we 300 tonna ýokary hilli plastmassa gaýtadan işlenip, senagatda peýdalanylar.
