Kirsti Kowentri Halkara Olimpiýa Komitetiniň (HOK) täze prezidenti wezipesine saýlandy. Bu barada guramanyň resmi web sahypasynda habar berildi.
Kowentri HOK-nyň Gresiýada geçirilen 144-nji mejlisinde gizlin ses berişlik arkaly, ýedi dalaşgäriň arasyndan saýlandy. Ol bu wezipede sekiz ýyl ýolbaşçylyk eder we 23-nji iýunda resmi taýdan ygtyýarlyklaryny kabul eder.
41 ýaşly Kirsti Kowentri Zimbabwede doglan we öňki suwda ýüzüji. Ol iki gezek olimpiýa çempiony, ýedi gezek dünýä çempiony we birnäçe gezek dünýä rekordçysy bolan. Kowentri 2018-nji ýyldan bäri, öz ýurdunyň sport, sungat we dynç alyş ministri wezipesini ýerine ýetirip gelýär. 2013-nji ýyldan bäri HOK-nyň agzasy bolup durýar. Ol şeýle-de 2017-2024-nji ýyllar aralygynda Halkara sýorfing federasiýasynyň wise-prezidenti wezipesinde işledi.
Kowentri HOK-nyň 130 ýyllyk taryhyndaky onunjy prezident, şeýle-de bu wezipä geçen ilkinji zenan we Afrikadan saýlanan ilkinji wekil boldy. Prezident hökmünde onuň gurajak ilkinji uly oýny 2026-njy ýylda Milanda we Kortinada geçiriljek Gyşky Olimpiýa oýunlary bolar.
Mundan ozal HOK-nyň prezidenti wezipesini 12 ýyllap germaniýaly Tomas Bah ýerine ýetiripdi. Ol bu wezipä ilkinji gezek 2013-nji ýylyň sentýabr aýynda saýlanyp, 2021-nji ýylda dört ýyllyk möhlet bilen gaýtadan saýlanypdy. Soňky saýlawlarda ol bu wezipä ýeke-täk dalaşgär bolupdy.
