Toyota ýetginjekler üçin niýetlenen kiçi FT-Me elektrokarynyň özboluşly konseptini görkezdi. Ulag tizligini 45 km/sag çenli artdyrýar we ykjamlylygy makul bilýän megapolisler üçin laýyk gelýär.
Modele iki adam sygýar, ýöne ol awtoduralga ýeriniň bary-ýogy ýarysyny eýeleýär. FT-Me kwadrosikl hökmünde görkezilýär, bu hem ony ýerli kanunlara baglylykda 14 ýaşdan başlap dolandyrmaga mümkinçilik berýär.
Konsept futuristik dizaýny bilen tapawutlanýar, ýöne onuň aýratynlyklary ýönekeý: uzynlygy – 2,5 metr, agramy – 425 kg. Geçýän menzili 100 km, ýöne üçekdäki Gün panelleri bir günde ýene 30 km goşýar.
Model doly derejede elektrik bolup, el bilen dolandyrylýar. Ýolagçy oturgyjyny aýryp, maýyplaryň arabasy üçin ýer boşatmak hem bolýar.
Kompaniýa FT-Me-ni kurýerler üçin ulagdan başlap, ýetginjekler ýa-da karşering üçin arzan ulag hökmünde görkezýär.
Onuň takyk aýratynlyklary we bahasy heniz belli däl, ýöne önümçilige goýberilen ýagdaýynda onuň bahasy 10 000 dollar töweregi bolar. Bu beýleki kompaniýalaryň şular ýaly ulaglaryndan gymmat däl. Deňeşdirmek üçin, Citroen Ami (64 km menzil bilen) 9950 dollara, Fiat Topolino (76 km) – 10 760 dollara, Mobilize Duo bolsa (160 km) – 10 800 dollara durýar.
