Toyota kompaniýasy Ýaponiýada «Crown Estate» uniwersalyny tanyşdyrdy diýip, «Carscoops» neşiri habar berýär.
Bu bäş gapyly ulag ABŞ-da «Crown Signia» ady bilen satylýar. Ol krossower bilen adaty uniwersalyň utgaşmasy hökmünde hödürlenýär. Ikinji hatardaky oturgyçlar dik durka onuň ýük bölüminiň göwrümi 570 litr bolýar. Eger-de oturgyçlar ýatyrylsa, ýük bölümi 1470 litre çenli giňeýär. Bu model Toyota-nyň 2 metrlik tekiz meýdany döredip bilýän ilkinji awtoulagydyr.
Awtoulagyň ýene bir esasy aýratynlygy – ýük bölüminiň içinden gönümel açylýan oturgyç we kiçiräk stol bolup durýar. Olaryň reňkleri interýer bilen sazlaşykly. Ulag üç sany sürüş tertibi bilen üpjün edilýär: «Normal», «Sport» we yzky oturgyçlarda has rahat syýahat etmek üçin «Rear Comfort».
Daşky görnüşi boýunça bu ulag «Crown Crossover» we «Crown Sport» modellerine meňzeýär, emma bir esasy tapawudy bar – munda radiatoryň gözenegi bamper bilen birleşdirilen. Täze modeliň interýeri hem «adajyklar» diýlip atlandyrylýan ýörelgä esaslanyp döredilipdir, ýagny dolandyryş panelindäki funksiýalar aýratyn toparlara bölünip goýlupdyr.
«Crown Estate» 2,5 litrlik atmosferiki benzinli-elektrikli gibrid hereketlendiriji bilen enjamlaşdyrylýar. Adaty gibrid görnüşinde bu hereketlendiriji 177 at güýjüni we 213 Nm torky öndürýär, zarýad berilýän gibrid görnüşinde bolsa 190 at güýjüni we 236 Nm torky üpjün edýär. Şeýle-de ulagda iki sany elektromotor bar: öňdäki motor 182 at güýjüni we 270 Nm torky, yzdaky motor bolsa 54 at güýjüni we 121 Nm torky öndürýär. «Crown Crossover» we «Crown Sport» modelleri bilen deňeşdirilende, «Crown Estate-iň» öňdäki elektromotorynyň güýji 50% artdyrylypdyr, şonuň üçin üsti ýükli ýagdaýynda hem ulagyň dinamiki häsiýetleri peselmeýär. Ulagyň umumy kuwwaty bolsa, degişlilikde 243 we 306 at güýjüne deňdir.
«Crown Estate» kuzowy boýunça bäş dürli reňkde we bäş sany iki öwüşgüni özünde jemleýän görnüşde elýeterli, interýeriniň bolsa üç sany reňk shemasy bar.
Ýaponiýada adaty «Crown Estate-iň» bahasy 6,35 million ýena (takmynan, 42,7 müň dollara), plagin-gibrid ulgamy bilen üpjün edilen görnüşi bolsa 8,10 million ýena (takmynan, 54,5 müň dollara) deň.
