Şu gyşda ABŞ-nyň Miçigan ştatyndaky Guron kölüniň töwereginde adaty bolmadyk açyk-mämişi reňkli täsin ak baýguş göze ildi. Guşuň ýerli suratçylar tarapyndan düşürilen şekilleri alymlaryň ünsüni özüne çekdi. Olar bu reňkiň nädip ýüze çykandygyny düşündirmek üçin dürli çaklamalary öňe sürdüler diýip, «The New York Times» neşiri habar berýär.
Baýguşlary öwrenýän institutyň (ORI) direktory Denwer Holt 35 ýyl bäri baýguşlary gözegçilikde saklap gelýändigini, emma beýle üýtgeşik ýagdaý bilen öň hiç haçan gabatlaşmandygyny aýtdy. Miçigan ştat uniwersitetiniň (MSU) biology Kewin Makgrou bu baýguşyň daşky gurşawyň hapalanmagy netijesinde ýüze çykan genetiki mutasiýa sebäpli mämişi reňke öwrülen bolmagynyň ähtimaldygyny aýtdy. Obern uniwersitetiniň (Auburn) ornitology Jeffri Hill bolsa, munuň tebigy mutasiýa sebäpli bolup bilmejekdigini, sebäbi reňkiň gaty ýagtydygyny we simmetrik däldigini belläp geçdi.
SNOWstorm taslamasynyň guramaçylaryndan Skott Waýdensoul bolsa, munuň sebäbini uçarlarda ulanylýan doňaklyga garşy suwuklyk bilen baglanyşdyrdy. Şol bir wagtyň özünde, ýerli ýaşaýjylar baýguşyň menekleriniň diýseň birsydyrgyn ýaýrandygyny, şonuň üçin bu tegmilleriň tötänleýin döräp bilmejekdigini öňe sürdüler.
Şeýle-de bolsa, Miçiganyň Tebigy baýlyklar bölümi baýguşy tutmagy meýilleşdirmeýändiklerini mälim etdi. Şeýlelikde, bu täsin ak baýguşyň syry açylman galyp biler.
