Norme ady bilen tanalýan YouTube blogeri dünýä rekordyny goýmak üçin köçede 38 sagatlap gymyldaman durdy. Onuň bu hereketiniň ýaýlymy onlaýndan daşary hem birtopar tomaşaçyny özüne çekdi.
Ol berk düzgünlere garamazdan, synagdan geçmegi başardy. Düzgünlere görä, egilmek, oturmak ýa-da duran ýagdaýyňy üýtgetmek bolmaýar. Onuň dostlary huşuny ýitirmezligi üçin ony pizza bilen naharlady.
Tomaşaçylar Normeniň duran ýerini derrew bildiler. Onuň muşdaklary we ötegçiler bu ýagdaýa dürlüçe garady: käbirleri onuň ýüzüne surat çekdi, egin-eşigine boýag sepdi, ajyhurş dökdi, beýlekiler bolsa, tersine, oňa eşik berdi. Normen bularyň ählisine çydamagy başardy.
2024-nji ýylda Norme başga bir rekord üçin göni ýaýlymda 11 gije-gündiz ýatman, auditoriýany haýran galdyrypdy. Şonda YouTube “jemgyýetçilik düzgünlerini bozandygy” üçin bu ýaýlymy petikledi, onuň akkauntyna ýazylan ulanyjylar bolsa tiz kömek çagyrdy. Ol ukusyz 264 sagat 24 minut saklanmagy meýilleşdiripdi, ýöne Ginnesiň rekordlar kitaby şeýle üstünlikleri birwagtlar hasaba almakdan ýüz öwürdi. Ýagny, gurama 1997-nji ýylda uky ýetmezçiligi sebäpli ýüze çykyp biljek töwekgelçiliklerden howatyrlanyp, şeýle üstünlikleri yzarlamagyny bes etdi. Soňky gezek ukusyz rekord 1986-njy ýylda Robert MakDonald tarapyndan goýuldy, ol 453 sagat 40 minut ýatmady.
