Daniýanyň PostNord poçta hyzmaty 2025-nji ýylyň 30-njy dekabrynda hat ibermek hyzmatyny bes eder we ünsüni diňe posylkalarda jemlär. Çözgüt sanlylaşdyrmak bilen baglanyşykly: soňky 25 ýylda poçta arkaly kagyz hatlarynyň iberilme mukdary 90%-den gowrak azaldy diýip, The Copenhagen Post neşiri ýazýar.
Poçta gullugynyň ýapylmagy 1500 iş ornunyň azaldylmagyna sebäp bolar. Şeýle hem, Daniýanyň köçelerinden 1500 sany gyzyl poçta gutusy aýrylar.
Üýtgeşmelere garamazdan, ýurduň içinde hat ugratmak dowam eder. 2024-nji ýylda tenderde döwlet poçta eltip berme şertnamasyny gazanan DAO logistika kompaniýasy bu wezipäni öz üstüne almaga taýyn.
Ýewropadaky poçta hyzmatlary hem kynçylyklar bilen ýüzbe-ýüz bolýar. Şeýlelik bilen, 6-njy martda Germaniýanyň Deutsche Post-y 8 müň işgäriň işden çykarylandygyny habar berdi. Britan Royal Mail-i hem edil şonuň ýaly kyn maliýe ýagdaýynda. PostNord 40% Daniýanyň hökümetine, 60% Şwesiýanyň hökümetine degişlidir. Kompaniýa 1624-nji ýyldan bäri üznüksiz işleýär.
Bu günki gün Daniýanyň içinde iberiş möhleti bäş güne çenli bolan ugradylýan iň arzan hatyň bahasy 4 ýewrodan sähel arzana düşýär diýip, The Guardian ýazýar. Daşary ýurtlara, mysal üçin goňşy Germaniýa hat ýa-da otkrytka ugratmagyň bahasy 6,70 ýewro töweregi durýar.
