Maserati italýan awtoulag brendiniň satuwlary 2024-nji ýylda örän pese gaçdy. Stellantis-iň berýän maglumatlaryna görä, Maseratiniň geçen ýyldaky satuwlary 2023-nji ýyldakydan 57% azalyp, bary-ýogy 11 müň 300 ulag satdy. 2023-nji ýylda bu görkeziji 26 müň 600 ulaga deňdi diýip, «Motor1» neşiri habar berýär.
Deňeşdirsek, Ferrari 2024-nji ýylda 13 müň 752 awtoulag satyp, satuwyny 0,7% ýokarlandyrdy, Lamborghini bolsa 10 müň 700 ulag satypdyr, bu hem ozalky ýyl bilen deňeşdirilende 5,7% ýokarydyr.
Bilermenleriň pikirine görä, Maserati-niň satuwynyň pese gaçmagynyň esasy sebäpleriniň biri şowsuz marketing strategiýasydyr. Kompaniýanyň täze baş müdiri Santo Fiçili, Maserati-niň 2025-nji ýylda-da girdeji gazanyp bilmejekdigini, ýöne 2026-njy ýylda girdeji gazanmagy maksat edinýändiklerini aýtdy.
Öň Maserati brendiniň satyljakdygy barada myş-myşlar dörän hem bolsa, Stellantis bu maglumatlary ret edipdi. Şol bir wagtyň özünde, 2024-nji ýylyň oktýabr aýynda konserniň öňki ýolbaşçysy Karlos Tawares käbir brendleriň öz görkezijilerini gowulandyrmak üçin diňe birnäçe ýylynyň bardygyny belläpdi. Bu ýagdaý Maserati brendine hem degişli bolup biler.
2025-nji ýylda Stellantis özüne täze baş müdir gözlemek işlerini dowam etdirýär we Maserati-niň geljegi entek anyk däl. Bilermenler brendiň ykbalynyň täze ýolbaşçylaryň kabul etjek kararlaryna bagly boljakdygyny çaklaýarlar.
