Huawei kompaniýasynyň «Verde» kod belgili täze eplenýän smartfony Pocket 3 adaty «gapjyk görnüşli» smartfonlardan tapawutly bolar. Täze modelde ekran adaty 21:9 ölçeginde däl-de, 3:2 gatnaşygyndaky aýratyn formatda bolar. Bu barada Digital Chat Station çeşmesine salgylanyp, «Gizmochina» neşiri habar berýär.
Täze enjamda içerki ekran 6,3 dýuým ölçegde bolar. Öndürijileriň pikirine görä, bu aýratynlyk interfeýsi has elýeterli etmek bilen birlikde, wideo görmek tejribesini hem gowulandyrar. Daşarky ekranyň ölçegi bolsa 3,5 dýuým bolar.
Onuň dizaýny 3:2 in-boý gatnaşygyny ulanýan iPad Mini modelini ýada salýar. Bu ykjamlygy we amatly ulanylşy ileri tutýan ulanyjylary özüne çekip biler.
Huawei kompaniýasynyň ýerine ýetiriji müdiri Riçard Ýu täze enjamy rewolýusion diýip häsiýetlendirdi. Onuň aýtmagyna görä, smartfon HarmonyOS operasion ulgamynda işlär. Şeýle-de Tencent, ByteDance, Alibaba we Meituan ýaly iri hytaý kompaniýalary öz programmalaryny täzelenen operasion ulgama laýyklykda uýgunlaşdyrarlar. Bu bolsa ulanyjylaryň tejribesini ep-esli gowulandyrar.
Huawei Pocket 3-üň programmalaýyn we enjamlaýyn üpjünçilikde ep-esli täzelenmeler almagyna hem-de eplenýän smartfon bazarynda uly bäsdeş bolmagyna garaşylýar.
Çeşmelere görä, Huawei Pocket 3-üň mart aýynda satuwa çykarylmagyna garaşylýar.
