28-nji fewralda agşam, Gün ýaşandan soň, “planetalaryň ýörişi” diýlip atlandyrylýan hadysa bolup geçer: Saturn, Merkuriý, Neptun, Wenera, Uran, Ýupiter we Mars asmanda bir hatara düzüler. Täze dogan Aý Aýdan serpigýän ýagtylygyň bolmazlygyna getirer, bu hem syn etmek üçin gowy şert döreder. Bu barada Perm milli gözleg politehniki uniwersitetiniň metbugat gullugyna salgylanyp, TASS habar berýär.
Ýedi planetanyň üçüsini ýörite gurallar bolmazdan görüp bolar.
“Bu gezek käbir planetalary [dury howada] ýörite optika bolmazdan görmek bolar: Wenera, Ýupiter we Merkuriý günbatar asmanda görner, gyzyl planeta Mars bolsa gündogarda ýerleşer. Uran, Saturn we Neptun planetalaryny dürbüsiz ýa-da teleskopsyz görüp bolmaz” – diýip, uniwersitetiň astronomiýa mugallymy Ýewgeniý Burmistrow düşündirýär.
Wenera Hut ýyldyzlar toplumynda günbatar gözýetime golaý ýerleşer. Ýupiter Sowur ýyldyzlar toplumynda, Merkuriý günbatar gözýetime golaý ýerleşer. Mars Jöwza ýyldyzlar toplumynda günorta gözýetimden belentde, Uran bolsa Hamal ýyldyzlar toplumynda, Sowur bilen serhetden uzak bolmadyk ýerde ýerleşer. Neptuny hem Hut ýyldyzlar toplumynda tapmak bolýar, Saturn hem Merkuriý ýaly gözýetime golaý ýerleşer.
Birnäçe planeta, köplenç, Günden bir tarapda ýerleşýän bolsa-da, olaryň köpüsiniň deňleşmegi örän seýrek hadysadyr.
“Ylmy nukdaýnazardan bu hadysanyň Ýere ýa-da adama düýpli fiziki täsiriniň ýokdugyny ýatdan çykarmaly däl. Planetalaryň Ýere grawitasiýa täsiri örän pes bolup, haýsydyr bir düýpli üýtgeşmeleri ýa-da kataklizmleri döretmäge ukyply däl” – diýip, uniwersitet belleýär.
