Mercedes-Benz Trucks kompaniýasy ýakyn wagtda «eArocs 400» atly täze elektrikli ýük ulagyny tanyşdyrar. Bu model 2025-nji ýylyň aprel aýynda geçiriljek halkara Bauma sergisinde görkeziler. «eArocs 400» şähergurluşyk pudagynda ulanmak üçin niýetlenen ilkinji elektrikli ýük ulagy bolar.
Täze «eArocs 400» ýük ulagy adaty dizel ýangyçly «Arocs» modellerine garşy ekologiýa taýdan arassa alternatiwa hökmünde hödürlener. Belläp geçsek, gurluşyk işleri üçin niýetlenýän «Arocs» kysymly ýük ulaglary 2013-nji ýyldan bäri öndürilýär.
Elektrik energiýasy bilen işleýän täze ýük ulagy, takmynan, 400 kWt-sagat sygymly akkumulýator bilen enjamlaşdyrylar. Bu akkumulýator onuň şähergurluşyk meýdançalarynda netijeli we durnukly işlemegine mümkinçilik berer. Onuň ähli tehniki aýratynlyklary, şol sanda bir gezeklik zarýad bilen geçip biljek ýoly we zarýad alyş tizligi barada resmi taýdan Bauma sergisinde mälim ediler.
Mercedes-Benz Trucks täze modeli bilen gurluşyk pudagynda elektrikli ýük ulaglaryň ulanylmagy bilen bagly möhüm ädim ädýändigine ynanýar. Kompaniýanyň berýän maglumatlaryna görä, häzirki wagtda Ýewropada satylýan ähli ýük ulaglarynyň takmynan, 20%-i gurluşyk pudagy üçin niýetlenendir. Şol sebäpden «eArocs 400» Mercedes-Benz kompaniýasynyň elektrikli ýük ulaglary bazaryndaky ornuny pugtalandyrmakda we giňeltmekde strategiki taýdan möhüm model bolar.
«eArocs 400» bilen bilelikde kompaniýa ulaglaryň howpsuzlyk ulgamyny we birikdirme tehnologiýalaryny hem kämilleşdirer. Şeýle-de Mercedes-Benz Trucks bu sergide elektrikli ýük ulaglary üçin ýörite işlenip taýýarlanan «TruckCharge» atly zarýad beriş infrastrukturasyna degişli ulgamyny hem hödürlär.
