UFC promouşeni UFC 314 ýaryşynyň esasy söweşlerini yglan etdi. Söweş agşamy 14-nji aprelde Maýamide (Florida) geçiriler.
UFC-niň prezidenti Dana Uaýt ýarym ýeňil agram derejesinde häzirki çempion ispan-gruziýaly söweşiji Iliýa Topuriýanyň öz titulyny boşatmak we ýeňil agrama geçmek kararyna gelendigini habar berdi.
“Topuriýa bu diwizionda gazanyp bilen zadynyň ählisini gazanandygyna we öz mirasyny berkidendigine ynanýar, ýöne onuň bedeni indi bu agramy göterip bilmeýär. Şonuň üçin Topuriýa ýeňil diwiziona geçer. Ol ýarym ýeňil agramda çempion titulyndan ýüz öwrer” – diýip, Uaýt X sosial ulgamynda ýazdy.
Şunuň bilen baglylykda erkin bolan titul ugrunda UFC-niň öňki çempiony awstraliýaly Aleksandr Wolkanowski bilen Braziliýanyň wekili Diego Lopes göreşer.
Wolkanowski öz guşagyny 2024-nji ýylyň fewral aýynda, Topuriýadan nokaut arkaly ýeňlip ýitirdi. Lopes 2024-nji ýylyň 14-nji sentýabrynda bolan soňky söweşinde emin agzalarynyň biragyzdan karary bilen Braýan Ortegany ýeňdi.
Agşamyň ýene bir esasy söweşinde ýeňil agramda titula öňki dalaşgär Maýkl Çendler angliýaly Peddi Pimblett bilen duşuşar.
Çendler soňky bäş söweşinde diňe bir ýeňiş gazandy we häzir iki ýeňlişden ybarat tapgyrda barýar, ol Dastin Porýeden we Çarlz Oliweýradan ýeňildi.
Pimblett geçen ýylyň iýul aýynda UFC-de altynjy ýeňşini gazandy, ol birinji raundda demikdiriiji usul bilen Bobbi Grinden üstün çykdy.
Ýarym ýeňil agramda ýene bir gyzykly tutluşyk geçiriler – meksikaly Ýair Rodriges UFC-de ilkinji gezek çykyş edýän, Bellator-yň öňki çempiony braziliýaly Patrisio “Pitbul” Freýre bilen söweşer.
