18-nji fewralda küşt boýunça Türkmenistanyň çempionatynyň ýokary ligasynyň oýunlary tamamlandy. Onda 14 ýaşly Jahan Rejepowa zenanlaryň arasynda çempion bolup, Türkmenistanyň taryhynda küşt boýunça iň ýaş çempion adyny aldy. Ýaryşlar Aşgabat şäherindäki Küşt-şaşka mekdebinde geçirildi.
Türkmenistanyň Küşt federasiýasynyň habar bermegine görä, tälimçi Zumrat Açilowanyň elinde türgenleşýän türkmenabatly ýaş zehin mümkin bolan 11 utukdan 9,5 utuk gazandy.
Ikinji orny 8,5 utuk bilen Ogulsuraý Baýramowa eýeledi. Üçünji orna bolsa 7,5 utuk bilen Leýla Şöhradowa mynasyp boldy.
Açyk derejede çempionlygy Halkara nebit we gaz uniwersitetiniň 20 ýaşly talyby Wepaly Halynyýazow aldy. Ol 7,5 utuk toplady. Bu derejede 19 ýaşly Leýla Şöhradowanyň ýaryşa gatnaşan ýeke-täk zenan bolup, erkekleriň arasynda 7 utuk bilen ikinji orny eýeledi. Üçünji orna bolsa Türkmenistanyň zenanlar ýygyndy toparynyň baş tälimçisi Şahruh Turaýew mynasyp boldy.
Çempionatyň jemleri boýunça Türkmenistanyň milli ýygyndysynyň düzümi kesgitlenildi. Bu ýygyndy topar ýakyn wagtda Gazagystanda we Birleşen Arap Emirliklerinde geçiriljek halkara ýaryşlarda ýurduň adyndan çykyş eder. Toparyň düzüminden zenanlar we açyk derejede baýrakly orunlary eýelän türgenler, şeýle-de grossmeýster Meýlis Annaberdiýew we Saparmyrat Atabaýew orun aldy.
