18-nji fewralda Kuala-Lumpurda Huawei Consumer Business 2025 tanyşdyrylyş çäresi geçirildi. Hytaý kompaniýasy bu çärede dört sany täze gurluşyny hödürledi: üç eplenýän smartfon Huawei Mate XT Ultimate, täze planşet, nauşnik we fitnes bilezigi.
Bu gurluşlaryň käbiri eýýäm deslapky sargyt üçin elýeterlidir.
Huawei Mate Pad Pro 13,2’’:
Planşet 2880x1920 piksel durulyk we 144 Gs täzelenme ýygylygy bilen 13,2 dýuýmlyk OLED ekranyna eýe boldy. Batareýa sygymy 10 100 mA/sag bolup, 0-dan 100%-e çenli 65 minutda zarýad alýar.
Gurluş hereket arkaly surata düşürmek tehnologiýasy bilen üpjün edildi. Ol dürli aksessuarlar, şol sanda stilus we klawiatura bilen gabat gelýär.
MatePad Pro 13,2’’ – iş üçin niýetlenen iň inçe planşetleriň biri. Onuň ýogynlygy bary-ýogy 5,5 mm. Üç kamera bar: 13 Mp esasy, 8 Mp giňburçly we 16 Mp frontal. Ses üçin Huawei Sound goldawy bilen alty dinamikadan ybarat stereofonik ulgam jogap berýär.
Ýewropada planşetiň bahasy klawiaturaly 12+256 GB esasy wersiýa üçin 1049 ýewro, PaperMatte bilen örtülen we şol bir ýat möçberine eýe bolan görnüş üçin 1199 ýewro barabar.
Huawei FreeArc:
Gulakda ykjam oturmagy üçin gaňyrçak şekilli sport nauşnigi. Ol IP57 ülňüsi boýunça suwdan goragly we 28 sagada çenli işläp bilýär.
Nauşnik galyňlygy 0,7 mm bolan ýokary hilli nitinol ergininden ýasaldy. Onuň berkidilýän ýeri bolsa lukmançylyk silikonyndan we trikotaždan taýýarlandy. Öndüriji bu gurluşyň 20 000 gezek egreltmä çydamlydygyny we ilkibaşdaky formasyny yzygider 5 ýyla çenli saklap biljekdigini kepillendirýär.
Nauşniklerde ses üçin 17x12 mm ölçegli draýwerler jogap berýär. “Garşylyklaýyn ses tolkunlary” tehnologiýasy aýdymy daş-töwerekdäki adamlar eşitmez ýaly edýär. Şeýle-de, goşa mikrofon bolup, ol hatda 4 m/s tizlikdäki ýelde-de gürleýän adamyň sesini tutup bilýär.
10 minudyň dowamynda alnan zarýad 3 sagada çenli işlemäge mümkinçilik berýär.
FreeArc nauşnikleri 119 dollar baha bilen ýaşyl, ak we gara reňklerde elýeterlidir.
Huawei Band 10:
1,47 dýuým AMOLED ekranyna eýe bolan fitnes bilezigi ýürek ritminiň we emosiýalaryň seljermesi, 100-den gowrak türgenleşik režimi, ädimleri yzarlamak, ganyň düzümindäki kislorody, dartgynlylyk ýagdaýyny we ukyny seljermek ýaly saglyga gözegçilik funksiýalary bilen üpjün edildi.
Täze siferblatlar peýda boldy: Panda Huahua, Starry Vista, Power Joy, Super Watch. Eger pandaly siferblaty işjeňleşdirseň, wirtual haýwan ulanyjynyň şähdini görkezer.
Fitnes bilezigi adaty režimde 14 güne, saglyk trekingi we AOD bilen 8 güne çenli işläp bilýär. Onuň bahasy heniz belli däl.
