Düýbi Germaniýada ýerleşýän «BASF» himiýa konserniniň bilermenleri geçen ýylyň jemlerine esaslanyp, awtoulag bazaryndaky iň meşhur reňkleri kesgitlediler. Geçen ýyllarda-da bolşy ýaly, üç esasy reňk dünýä derejesindäki üýtgewsiz öňdeligini saklamaga dowam edýär. Emma hromatiki reňkleriň arasyndaky modanyň yzygiderli üýtgeýär.
Bütin dünýä boýunça ak reňkiň paýy 34%-e deň. Ondan soňra bolsa gara (22%) we çal (17%) reňkler gelýär. Beýleki bir nusgawy reňk bolan kümüşsöw bolsa bazaryň 8%-ini eýeleýär.
Hromatiki reňkleriň arasynda 7% paýy bilen iň meşhur reňk gökdür. 2024-nji ýylda ulaglaryň 4%-i gyzyla, 2%-i bolsa ýaşyla boýaldy. Analitikleriň bellemegine görä, indi sary reňk öňküsinden iki esse diýen ýaly has meşhur. Ýöne şonda-da onuň bazardaky paýy 1,5%-den hem geçmeýär.
Sebitlere görä reňkleriň meşhurlygy:
- Ýewropa, Ýakyn Gündogar we Afrika: bu sebitlerde ulaglaryň 27%-i ak, 22%-i çal reňkde. Hromatiki reňkleriň arasynda bolsa iň meşhury gök (9%).
- Amerika: alyjylaryň 29%-i ak, 20%-i bolsa gara we çal reňkli ulaglary saýlaýar. Gök reňk bu ýerde-de 9% bilen öňdeligi saklaýar.
- Aziýa-Ýuwaş umman sebitleri: bu ýerlerde ak reňk has-da meşhur – 38%. Gara reňkli ulaglaryň paýy bolsa 24%. Hromatiki reňkler boýunça gök reňk bu ýerde-de 5% paýy bilen öňdeligi eýeleýär.
