Huawei kompaniýasy Ýaponiýada täze FreeArc simsiz nauşnigini tanyşdyrdy. Adaty simsiz nauşniklerden tapawutlylykda FreeArc açyk gurluşly bolup, ol gulagyň üstünden dakylýar. Ergonomiki gulak ýaýy onuň gulaga ygtybarly oturmagyny üpjün edýär diýip, «Gizmochina» neşiri habar berýär.
Nauşnigiň korpusy titan-nikel splawyndan we derini gyjyndyrmaýan silikon materialdan ýasalan. Bu materiallar aerokosmiki we lukmançylyk pudaklarynda giňden ulanylýar. Çydamlylyk synaglaryna görä, nauşnik 20 müňden gowrak epilmä çydamly bolup, 5 ýyla çenli öz formasyny üýtgetmän saklap bilýär.
Huawei FreeArc nauşnigi Huawei C-bridge bilen baglanyşýan iki bölekden ybaratdyr. Nauşnigiň batareýasy onuň ses çykaryjy «akustiki top» diýilýän böleginiň yz tarapynda ýerleşdirilendir.
Her bir modul 17 × 12 mm ölçegli, duýgurlygy ýokary dinamika bilen enjamlaşdyrylandyr. Titan bilen örtülen kompozit diafragma we güýçli neodim magnit bilen üpjün edilen bu dinamikalar deňagramly hem-de hakykada ýakyn sesleri döredip, çuňňur baslary berip bilýär. Iki sany mikrofon bolsa daşarky işjeň sesleri basyp, 4 m/s tizlikde öwüsýän ýeliň ugrunda hem arassa telefon gepleşiklerini geçirmäge mümkinçilik berýär.
Nauşnik suwa we tozana garşy IP57 gorag standarty bilen üpjün edilendir.
Huawei FreeArc nauşnigi zarýad gutusy bilen bilelikde jemi 28 sagada çenli işleýär. Diňe 10 minut zarýada goýmak bilen 3 sagada çenli ulanyp bolýar.
Nauşnigiň bahasy 18800 ýena (takmynan 124 dollar) diýlip kesgitlenildi.
