ABC News neşiriniň žurnalistleri dünýäde iň köp ulanylýan dört sifrli parollaryň sanawyny düzdüler. Bu netijeler, maglumat syzmalaryny ýüze çykarmak üçin ulanylýan «Have I Been Pwned?» web sahypasynda ýerleşdirilen 29 million parolyň derňewinden alyndy.
Iň giňden ýaýran dört sifrli PIN-kod iň ýönekeý utgaşma bolan 1234 bolup çykdy. Bu kody dünýädäki her 10 adamdan biri ulanýar.
Ikinji iň meşhur PIN-kod 0000, üçünjisi bolsa 1111 boldy. Sanawyň ilkinji onlugyna 1212 we 4444 hem girýär. Şeýle hem 4321 kody hem köp ulanylýar. Käbir adamlar üýtgeşigräk hereket edýärler – PIN-kodlarynda sifrleriň ilkinji dördüsini üýtgedip ulanýarlar, meselem, 1342. Belläp geçsek, 1342 dördünji iň meşhur PIN-kod bolupdyr.
Şeýle PIN-kodlar, howpsuzlyk düzgünleri sebäpli, onlaýn hyzmatlarda ýa-da sosial torlarda hasaba alynmak üçin ulanylmaýar – bu platformalar has uzyn we çylşyrymly parollary talap edýär. Dört sifrli kodlar esasan smartfonlary we beýleki enjamlary goramak, şeýle hem internet-bank hyzmatlaryna girmek üçin ulanylýar.
«Iň köp ulanylýan PIN-kodlar haýran galdyryjy derejede meşhur bolup çykdy, bu ýagdaý eger telefonlar we bank kartlary başga biriniň eline geçen ýagdaýynda olaryň aňsatlyk bilen çaklanyp bilinjekdigini aňladýar» diýip, ABC News ýazýar.
Žurnalistler PIN-kodlaryň haýsy sifrler bilen başlaýandygyny we haýsy sifrler bilen gutarýandygyny görkezýän grafika hödürlediler. Netijede, 19 we 20 utgaşmalarynyň örän meşhurdygyny belläp geçdiler – sebäbi ulanyjylar PIN-kod hökmünde köplenç öz doglan ýyllaryny hem ulanýarlar. Ilkinji onluga 1986 we 2004 ýaly ýyllar girýär.
Şeýle hem derňewde, 5 bilen 8 aralygyndaky sifrleriň has seýrek ulanylýandygy anyklanyldy.
Mundan başga-da, iň ýaramaz PIN-kodlaryň sanawyna 2580 hem girýär. Ilki bilen bu kod çylşyrymly ýaly görünýär, emma aslynda ol smartfonyň klawiaturasynyň ýokardan aşaklygyna dik hataryna gabat gelýär.
«10 müň sany mümkin utgaşmanyň bardygyna garamazdan, gürrüň adamlara gelende, bu deňleme gaty çalt bozulýar. Eger kimdir biri islendik bir ogurlanan telefony açmak ýa-da bankomatdan pul çekmek islese we bary-ýogy bäş gezek synanyşmaga mümkinçiligi bar bolsa, dogry PIN-kody tapmak ähtimallygy 1/8 bolýar» diýip, ABC News neşiriniň redaktorlary Julian Fell we Tereza Tan belläp geçdiler.
