Inžener we meşhur ýutubçy Jeýms Bruton tekerleriň ýerine iki sany uly şar ulanylan adaty bolmadyk, öz-özüniň deňagramlylygyny saklap bilýän elektromotosikl döretdi. Bruton bu taslamanyň ähli çyzgylaryny we programma üpjünçiligini köpçülige açyk edip paýlaşdy diýip, New Atlas habar berýär.
Ulag dört sany elektrik hereketlendirijisi bilen dolandyrylýar. Deňagramlylygy saklamak üçin tizlenmäni, burulma tizligini we enjamyň ýerleşişini ölçäp bilýän inersial ölçeg birligi (IMU) ulanylýar.
Motosikl islendik tarapa hereket etmäge mümkinçilik berýän omni-tigirler ulgamy bilen enjamlaşdyrylan. Dolandyryş iki tutawaç arkaly amala aşyrylýar: sag tarapky tutawaç ulagyň öňe we yza hereket etmegini, çep tarapky bolsa saga-çepe burulmagyny üpjün edýär. Mundan başga-da, howa ýassykly gaýygyň (howerkraft) dolandyrylyşyna meňzeş ýörite manýowr sazlamasy bilen hem üpjün edildi.
Ulaga güýç bermek üçin 50 woltlyk ulgam hökmünde biri-birine birleşdirilen alty sany litiý-polimer akkumulýator ulanylýar.
Motosikliň ähli gurluş böleklerini, şol sanda metal elementleri we 3D tehnologiýasy bilen çap edilen komponentleri Brutonyň hut özi işläp düzdi. Programma üpjünçiligini bolsa Arduino platformasynda ýazdy.
Bruton beýleki höwesjeňleriň hem bu taslamany özleri gaýtalap bilerler ýaly, çyzgylary, kodlary we diagrammalary köpçülige açyk edip paýlaşdy.
