Toyota Previa/Estima-nyň dördünji nesliniň üstünde işläp başlady. Bu awtoulag düýbünden täze platformanyň esasynda gurnalar we 2027-nji ýylda satuwa çykarylar diýip, ýapon Best Car Web neşiri habar berýär.
Ilkinji tapgyrda täze Previa/Estima üçin esas hökmünde e-TNGA platformasynyň ulanylmagy göz öňünde tutulýardy. Bu platforma Toyota bZ4X, Lexus UX300e we Lexus RZ modelleriniň esasyny düzýär. Emma bu elektrikli awtoulaglaryň satuwy dünýä bazarynda örän pes boldy. Şol sebäpden hem meýilnamalar üýtgedildi: Täze nesil Previa doly elektrik hereketlendirijili görnüşde hem-de zarýad edilip ulanylýan gibrid görnüşde hödürlener.
«Toyota-nyň pikirine görä, Estima barada gürrüň gidende, dizaýn we tehnologiýalar täzelikçi bolmaly, janköýerler hem şeýle pikir edýär. Awtoulagyň dizaýny ilkinji nesil Estima-ny ýatladar diýen gep-gürrüňler hem bar» diýip, Best Car Web neşiri ýazýar.
Şeýle-de täze nesil miniwende diňe bir täze hereketlendiriji ulgamlar däl-de, «steer-by-wire» ulgamy hem göz öňünde tutulýar. Bu ulgamda rul bilen tekerleriň arasynda adaty mehaniki baglanyşyk bolmaýar, tekerler elektron ulgam arkaly dolandyrylýar.
