Ýaponiýanyň Nissan awtoulag öndürijisi Hytaýyň Dongfeng kompaniýasy bilen bilelikde işlenip taýýarlanan täze N7 elektrik sedanyny hödürledi. Bu awtoulag Hytaýda 2025-nji ýylyň maý aýynda satuwa çykarylar diýip, Carnewschina habar berýär.
Bu model, soňky bäş ýylda kompaniýanyň Hytaý bazarynda söwdasynyň peselmegi bilen bagly, Nissan-nyň bu bazarda ornuny gaýtadan dikeltmek ugrundaky strategiýasynyň bir bölegidir. Kompaniýanyň 2024-nji ýyldaky satuwy 2019-njy ýyl bilen deňeşdirilende 49% azaldy, bu elektrik ulaglarynyň we gibridleriň artýan meşhurlygy bilen düşündirilýär. Nissan bu segmentde yzda galýar, satuwda elektromobiliň diňe bir modeli - Ariya bar.
Guançžou awtoulag sergisinde ilkinji gezek görkezilen N7 sedany "hytaý maşgalalarynyň arasynda arassa elektrik ulaglary üçin täze standart kesgitlemegi maksat edinýär". Awtoulagy satmak üçin ýüztutma 2025-nji ýylyň ýanwar aýynda tabşyryldy.
Nissan N7 ölçegleri 4930 x 1895 x 1487 mm we tigirli bazasy 2915 mm bolan uly sedan. Ol R17 ýa-da R19 tekerler bilen elýeterli bolar. Sedan başlangyç kuwwaty 215 at güýji we has güýçli wersiýa bolsa 268 at güýji bolan, Dongfeng tarapyndan öndürilen bir elektrik hereketlendirijisi bilen enjamlaşdyrylandyr. LFP akkumulýatory Dongfeng-Sunwoda bilelikdäki kärhana tarapyndan öndürilýär.
Awtoulagda 0,208 Cd pes çekiş koeffisiýenti bar. Öň tarapynda 710 diodly interaktiw LED paneller, yzky böleginde 882 diodly arka yşyklaryň interaktiw zolagy bar. N7-iň kompýuter bölegi Qualcomm Snapdragon 8295P çipinde guruldy. Şeýle hem, awtoulagda Dongfeng Nissan we Momenta tarapyndan işlenip taýýarlanan akylly hereketlendiriji ulgam ulanylar.
Dongfeng Nissan -yň baş direktorynyň sözlerine görä, kompaniýa N7 çykandan soň, bir ýylyň içinde ýene dört sany täze awtoulag modelini satuwa çykarmagy meýilleşdirýär.
