Koreýanyň ösen tehnologiýalar institutynyň (KAIST) alymlary sekuntda 9120 kadr düşürmäge ukyply kamerany döretdiler. Bu üstünlik tebigatdan ylham alyp gazanyldy: tehnologiýanyň esasy böleginde mör-möjekleriň göz gurluşyndan peýdalanyldy. Bu gurluş çalt hereketleri görmäge we pes ýagtylyk şertlerinde işlemäge ukyplydyr diýip, Tech Xplore neşiri habar berýär.
Adaty kameralar ýokary tizlikde surata düşürýän wagty uly kynçylyklar bilen ýüzbe-ýüz bolýarlar: kadr ýygylygy näçe ýokary bolsa, ýagtylygy ýygnamak üçin wagtyň şonça-da az bolmagy suratlaryň hilini peseldýär. Professorlar Ki-Hun Jong we Min H. Kimiň ýolbaşçylygyndaky barlagçylar bu meselä çözgüt tapdylar. Olar “jemlenen göz” ulgamy bilen işleýän tehnologiýany döretdiler, bu ulgam kameralaryň şol bir wagta dürli wagt aralyklaryndan kadrlary düşürmegine mümkinçilik berýär.
Bu innowasiýa her kadrda ýygnan ýagtylygynyň kömegi bilen kameranyň duýujylygyny artdyrýar. Bu usul adaty kameralaryň düşürip bilmeýän pes ýagtylykdaky obýektlerini düşürmäge hem mümkinçilik berýär. Mundan başga-da, kamera ýoýulmalary aradan aýyrmak we aýdyň suratlary dikeltmek üçin ýörite algoritm bilen üpjün edilen.
Enjamyň gurluşy örän ykjam: onuň galyňlygy 1 millimetrden az, bu bolsa ony mobil enjamlar, lukmançylyk barlaglary we wideo gözegçilik ulgamlary üçin amatly edýär. Kameranyň täsin arhitekturasy surata düşürmegiň tizligini, suratyň hilini ýitirmezden ep-esli ýokarlandyrmaga mümkinçilik berýär.
Barlagçylar tehnologiýany ösdürmegi, 3D şekilleri we örän ýokary çözgütli algoritmleri işläp taýýarlamagy meýilleşdirýärler. Geljekde bu kameralaryň biomedikal wizualizasiýada, göçme ulgamlarda, ýokary tizlik hem-de hil talap edýän beýleki ugurlarda ulanylmagyna garaşylýar.
