Islam Mahaçew bilen Arman Sarukýanyň arasynda ýeňil agramda UFC-niň çempiony tituly ugrundaky uzak garaşylan söweş ýatyryldy. Bu barada şenbe güni, söweşijileriň agramyny çekmek dabarasy meýilleşdirilen wagty mälim boldy. Iň soňky pursatda Sarukýanyň şikes sebäpli çykyş edip bilmejekdigi belli boldy.
Alan şikesi barada rus-ermeni söweşijisi sosial ulgamlarda habar berdi.
“Gynanç bilen meniň arka şikesi sebäpli UFC 311-den aýrylmaly bolandygymy habar berýärin. Bu meniň söweş karýeramda kabul etmeli bolan iň kyn çözgütlerimiň biri boldy. Men UFC guramasyna ýagdaýa düşünendigi üçin minnetdarlyk bildirýärin we geljekde ilkinji UFC titulym üçin söweşmek mümkinçiligine sabyrsyzlyk bilen garaşýaryn” – diýip, Sarukýan sosial ulgamlarda ýazdy.
Söweş ýekşenbe güni irden geçirilip, UFC 311 ýaryşynyň esasy wakasy bolmalydy. UFC-niň guramaçylary Sarukýanyň deregine gyssagly başga bir söweşijini tapmaly boldy.
Netijede, promouşen Mahaçewiň ýeňil agramly söweşijileriň reýtinginde 10-njy orny eýeleýän braziliýaly Renato Moýkano bilen söweşjekdigini yglan etdi.
UFC-niň prezidenti Dana Uaýt sosial ulgamlarda guramanyň häzirki çempiony Islam Mahaçewiň bu waka nähili garandygyny gürrüň berdi: “Haçan-da men Islama jaň edenimde, ol şeýle diýdi: “Men çempion we islendik kişi bilen söweşerin”.
Mahaçewiň hasabynda 26 ýeňiş we bir ýeňliş, Moýkanonyň hasabynda 20 ýeňiş we 6 ýeňliş bar. Deslapky söweşler Aşgabat wagty bilen 4:00-da, ýaryşyň esasy bölegi 8:00-da başlar. Söweş “Матч! Боец” we “Матч!” telekanallarynda, şeýle-de UFC Fight Pass platformasynda ýaýlyma berler.
