5-10-njy ýanwar aralygynda Aşgabat ýöriteleşdirilen küşt we şaşka mekdebinde 20 ýaşa çenli oglan we gyzlaryň arasynda küşt boýunça Türkmenistanyň çempionaty geçirildi. Bu barada Orient habar berýär.
Oglanlaryň arasynda nusgawy küşt boýunça geçirilen ýaryşda Türkmen döwlet binagärlik-gurluşyk institutynyň talyby Wepaly Halýynazow mümkin bolan 11-den 9 utuk toplap, ýeňiş gazandy. 8,5 utuk toplap degişlilikde 2-nji we 3-nji orny Lebap welaýatyndan mekdep okuwçysy Serdar Baýramow we Türkmen döwlet bedenterbiýe we sport institutynyň talyby Amanmuhammet Hommadow eýeledi.
Gyzlaryň arasynda geçirilen ýaryşda Halkara nebit we gaz uniwersitetiniň talyby Läle Şöhradowa yzly-yzyna ikinji ýyl bäsdeşlerinden üstün çykyp, mümkin bolan 11-den 9 utuk toplady. Doganlar Şöhradowalaryň ýene biri Leýla (Lebap, 18 ýaş) ýarym utuk yza galyp, ikinji ýeri eýeledi, Gulmira Seýilhanowa (Lebap, 17 ýaş) 8 utuk bilen ilkinji üçlügi jemledi.
Çempionatyň ýeňijileri 23-nji fewraldan 8-nji mart aralygynda Çernogoriýada geçiriljek ýetginjekleriň arasyndaky dünýä çempionatynda, şeýle hem Kolombo (Şri-Lanka) şäherinde geçiriljek ýetginjekleriň arasynda Aziýa çempionatynda Türkmenistana wekilçilik etmek hukugyny aldylar.
