Koreýa Respublikasynyň çäginde ýaşaýan daşary ýurtly raýatlar indi sanly şahadatnamalaryny almak üçin arzalaryny tabşyryp bilerler. Şahadatnamalar iň köp ulanylýan operasion ulgamlarda işleýän smartfonlarda elýeterli bolar. Bu hyzmat 14 ýaşyndan ýokary bolan şahslara elýeterli bolar diýip, Korea Herald neşiri habar berýär.
Sanly şahadatnamalar fiziki kartlar bilen deň hukuga eýe bolar. Mysal üçin, olary döwlet edaralarynda, hassahanalarda we dükanlarda ulanyp bolar. Koreý hökümeti, sanly maliýe hyzmatlarynda şahsyýeti tassyklamak üçin elektron kartlary ulanmak maksady bilen, iri banklar we degişli guramalar bilen gepleşikleri geçirýär.
Sanly şahadatnamany iki usul bilen alyp bolýar. 2025-nji ýylyň başyna çenli berlen fiziki kartlaryň eýeleri migrasiýa edaralaryna barmaly bolar. Emma şu ýylyň 1-nji ýanwaryndan soň şahadatnama alan adamlar üçin bu has aňsat bolar: olar şahadatnamany smartfonlaryna ýakynlaşdyrsa ýeterlik, sebäbi şahadatnamada ýörite çip ýerleşdirilen we ol mobil goşundynyň üsti bilen sanly görnüşi ýüklemäge başlaýar.
Hökümet şahsy maglumatlaryň goragyny üpjün etmek üçin blokçeýn we şifrleme ýaly öňdebaryjy howpsuzlyk tehnologiýalaryny ornaşdyrmagy meýilleşdirýär. Her bir mobil şahsyýetnama, diňe şol adamyň adyna hasaba alnan enjama bagly bolar.
