Barselonanyň Global saglyk instituty (ISGlobal) tarapyndan geçirilen barlag oba ýerlerinde 5G ulanylmagynyň saglyga zyýanly bolup biljekdigini ýüze çykardy diýip, Eurekalert habar berýär.
Alymlar radiasiýany dürli ýagdaýlarda: smartfonyň geçirijisini öçürmek, aşa köp maglumat ýüklemek we uly faýllary ibermek arkaly ölçäp gördüler. Synag 5G-niň hemme ýerde ornaşdyrylan ýurdy bolan Şweýsariýada geçirildi.
Netijede, uly faýllar yzygiderli iberilende şäherlerde radiasiýanyň ortaça täsiri 16 mWt/m2, obalarda bolsa bu görkeziji iki esse ýokary - 29 mWt/m2 bolup çykdy. Bu tapawut oba ýerlerinde merkezi stansiýalaryň az bolmagy bilen baglanyşyklydyr - bu signalyň hilini peseldip, maglumat iberende enjamlary has köp energiýa sarp etmäge mejbur edýär.
“Biziň geçiren barlagymyzda telefonyň ölçeg enjamyndan, takmynan, 30 sm uzaklykda ýerleşendigini göz öňünde tutmalydyrys, bu netijelerimiziň radiasiýanyň hakyky täsirinden pes bolup biljekdigini aňladýar. Ykjam telefony ulanyjy telefony göwresine has ýakyn saklaýar we şeýlelik bilen, RF EMF-iň täsiri 10 esse artyk bolup biler " – diýip, barlagyň awtorlary duýdurýarlar.
Barlag merkezi stansiýalaryň gür däl ýerinde daşky gurşawa ýetirýän täsiriniň pesdigini görkezýär. Emma, şeýle ýagdaýda ykjam telefonlardan radiasiýanyň ýaýraýşy ep-esli ýokarlanýar.
"Munuň geň netijesi bar: ykjam telefonlaryň adaty ulanyjylary merkezi stansiýalaryň gür däl ýerlerinde RF EMF radiasiýasyna has köp sezewar bolýar" – diýip, alym gysgaça netijä gelýär.
