Nýu-Ýorkda geçirilen Blitz boýunça dünýä çempionatynda ýeňşi iki küştçi - norwegiýaly Magnus Karlsen we russiýaly Ýan Nepomnýaşiý paýlaşdy. Şeýle karar ýaryşyň taryhynda ilkinji gezek kabul edildi diýip, Halkara küşt federasiýasy (FIDE) habar berýär.
Küştçüler jemi ýedi oýun oýnadylar. Karlsen ilkinji ikisinde utdy, ýöne Nepomnýaşiý soňraky ikisinde utduranyny yzyna gaýdyp alyp bildi. Taý-breýk hem güýçlini saýlap bilmedi - üç döw deňme-deňlikde tamamlandy. Şondan soň Karlsen tituly paýlaşmagy teklip etdi.
“Bu gün uzaga çekdi. Biz köp oýnadyk. Oýny dowam etdirmek çenden aşa boljakdy. Ýeňşi paýlaşmak dogry karar boldy. Tomaşaçylar, elbetde, ikimiziňem ýadawdygymyza we degnamyzyň dartylandygyna düşündiler. Gelnen karar bilen kä adam ylalaşsa, käsi ylalaşman biler "- diýip, norwegiýaly grossmeýster düşündirdi.
FIDE-iň prezidenti Arkadiý Dorkowiç bu teklibi goldady we küştçüleriň ikisi-de altyn medal aldy. Kümüş medal hiç kime gowşurylman galdy.
Nepomnýaşiý garşydaşynyň kararyna geň galandygyny boýun aldy. “Meniň pikirimçe, şu günki karardan soň halkara federasiýasy ýeňijini kesgitlemek üçin armageddony yzyna getirmeli bolsa gerek. Ýöne men bu barada iňirdemek islämok "- diýip, russiýaly türgen belledi.
Zenanlaryň ýaryşynda hytaýly Szýuý Wenszýun finalda watandaşy Leý Tinszeden üstün çykyp ýeňiji boldy.
Ondan öň Nýu-Ýorkda geçirilen çalt oýnalýan küşt boýunça dünýä çempionatynda 18 ýaşly russiýaly küştçi Wolodar Murzin ýeňiji bolupdy. Karlsen dress-kody bozanlygy sebäpli şol çempionatdan aýrylypdy. Ol ýaryşa jinsi geýip gelipdi. Bu wakadan soň FIDE düzgünleri biraz ýumşatmak kararyna geldi we norwegiýaly küştçä ýaryşlara gatnaşmagyny dowam etdirmäge rugsat berildi.
