Türkmenistanda Türkmen döwlet bedenterbiýe we sport institutynyň Ylym bölüminiň başlygy Şamuhammet Nepesowyň taýýarlamagynda «Ylym» neşirýaty tarapyndan «Sport fotožurnalistikasy» atly okuw gollanmasy neşir edildi.
Okuw gollanmasy sport žurnalistikasy hünärinde bilim alýan talyp ýaşlara sport fotožurnalistikasynyň aýratynlyklaryny öwretmegi maksat edinýär. Sport ugrundan makalalary ýazmagyň, olary surat bilen bezemegiň ýollaryny salgy berýär. Sport fotožurnalistikasynyň görnüşlerini düşündirýär. Şonuň ýaly-da, sport fotohabarlarynyň türkmen gazet-žurnallarynda berlişini seljerýär.
Sport žurnalistikasy hünärinde bilim alýan talyp-ýaşlaryň sport fotožurnalistikasynyň aýratynlyklaryny ýokary derejede ele almaklaryny gazanmak, olara sport fotosuratlaryny taýýarlamak, metbugat neşirlerinde fotosuratlary ýerleşdirmegi öwretmek, sport fotožurnalistiniň işleriniň köptaraplylygyny, şeýle-de ýurdumyzda neşir edilýän gazet-žurnallaryň we daşary ýurtlaryň fotožurnallarynyň üsti bilen sport suratlaryny, kadrlaryny içgin seljermegi öwretmek – bu dersiň esasy maksady bolup durýar.
Okuw gollanmasy girişden, “Sport fotožurnalistikasy dersiniň maksady we wezipeleri”, “Fotografiýanyň döreýiş taryhy”, “Fotožurnalistikanyň taryhyndan umumy maglumat”, “Fotožurnalistika türkmen metbugatynda”, “Türkmen metbugatynyň taryhyndan”, “Sportuň adamzat jemgyýetinde tutýan orny”, “Sport – fotožurnalistikanyň bir ugry hökmünde”, “Sport bilen bagly ilkinji gazet-žurnallar”, “Türkmen sport fotožurnalistleri”, “Sport fotožurnalistine kömek: sport ýaryşlaryndan nähili surat almaly?”, “Sportuň görnüşlerine görä surata almagyň aýratynlyklary”, “Internet we sport fotožurnalistikasy”, “Sport fotožurnalistikasynyň žanrlary”, “Fotodükanlar. Olaryň metbugatda we internet saýtlarynda ulanylyşy”, “Sport fotožurnalistikasy we etika” atly bölümlerden hem-de peýdalanylan edebiýatlardan ybaratdyr.
