Prezident Serdar Berdimuhamedow Koreýa Respublikasynyň Prezidentiniň wezipesini wagtlaýyn ýerine ýetiriji Çoý Sang-moka “Jeju Air” awiakompaniýasynyň raýat uçarynyň köp sanly adam pidalaryna we şikes ýetmelere getiren heläkçilige uçramagy zerarly gynanç hatyny iberdi.
Döwlet Baştutany şu agyr pursatda gurban bolanlaryň ähli dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle hem hut öz adyndan ýürekden gynanjyny, medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi diýip, metbugatda çap edilen hatda aýdylýar.
29-njy dekabrda irden “Jeju Air” awiakompaniýasynyň Bangkokdan Muana uçýan (Seuldan 288 km günorta-günbatarda) Boeing 737−8AS uçary Muan howa menziliniň uçuş-gonuş zolagyndan daşyna çykyp gitdi. Uçar tekerleri açylmazdan gondy we uçuş-gonuş zolagynyň ahyryndaky böwete baryp urdy. Netijede heläkçilige uçrady.
Uçarda 175 ýolagçy we 6 sany ekipaž agzasy bardy. Häzirki maglumatlara görä, heläkçilikde diňe iki adam aman galdy.
