Küşt boýunça dünýa çempiony ady ugrundaky oýnuň 12-nji döwi tamamlandy. Bu gezek titulyň häzirki eýesi, hytaýly grossmeýster Din Ližen hindistanly bäsdeşi Gukeş Dommarajuny utdy. Oýunda umumy hasap ýene-de deňleşdi – 6:6.
Hytaýly küştçi 11-nji döwde utulandan bir gün soň utmagy başardy. Mundan öň garşydaşlar yzygider ýedi döw deňme-deň oýnadylar.
9-njy dekabrda geçirilen 12-nji döwde Ližen eýýäm ilkinji göçümlerde garşydaşyna güýçli bäsdeşlik görkezip, kem-kemden artykmaçlygyny artdyrdy. Gukeş ahyryna çenli garşylyk görkezdi, ýöne ahyrsoňy ýagdaýyň gutulgysyzdygy düşnükli bolandan soň boýun egmeli boldy.
Oýnuň gutarmagyna iki döw galdy. Eger olaryň jemi boýunça ýeňijini kesgitlemek başartmasa, garşydaşlara taý-breýk (goşmaça oýun) garaşýar.
Ýatlap geçsek, dünýä çempiony tituly üçin ýaryşyň 138 ýyllyk taryhynda ilkinji gezek Aziýadan iki küştçi göreşýär. Oýun 23-nji noýabrdan 15-nji dekabr aralygynda Singapurdaky Resorts World Sentosa-da geçirilýär.
