"Stellantis" awtokonserni baş direktory Karlos Tawaresiň işinden boşadylandygyny resmi taýdan mälim etdi. Ol bu konserni döräni bäri dolandyryp gelýärdi. Karlos aslynda 2026-njy ýylda şertnamasy gutarandan soň işinden aýrylmalydy, ýöne näbelli sebäplere görä, kompaniýa bu çözgüdi yza süýşürmezlik kararyna geldi diýip, auto.ru habar berýär.
Konserne täze ýolbaşçy bellenýänçä, bu wezipe "Stellantisiň" başlygy Jon Elkannyň ýolbaşçylygyndaky wagtlaýyn ýerine ýetiriji komitet tarapyndan dolandyrylar.
Karlosyň işinden boşadylmagynyň resmi sebäpleri mälim edilmedi, ýöne metbugat beýanatynda Tawares bilen kompaniýanyň direktorlar geňeşiniň arasynda bolup biljek düşünişmezlikler agzaldy. Kompaniýa täze baş direktoryň meselesini eýýäm çözüp başlandygyny tassyklady, ýöne bu ýagdaý birnäçe aý dowam edip biler.
Karlos Tawares 2014-nji ýyldan bäri "PSA" bileleşigine ýolbaşçylyk edýärdi. Ol "PSA" we "Fiat-Chrysler-iň" birleşmegi netijesinde 2021-nji ýylda döredilen "Stellantisiň" iş dolandyryjysy boldy.
Çeşmeleriň berýän habaryna görä, "Stellantisiň" soňky aýlarda başdan geçirýän maliýe kynçylyklarynyň netijesinde "Renault" bilen birleşmek ähtimallygy baradaky habarlar hem gelip gowuşdy. Şeýle-de bolsa, iki kompaniýanyň ýolbaşçylary hem bu maglumatlary ret etdiler.
