Hytaýly grossmeýster Din Ližen bilen hindi küştçüsi Gukeş Dommarajunyň arasynda geçirilýän küşt täji ugrundaky ýaryşyň altynjy duşuşygy deňme-deň tamamlandy. Singapurda geçirilýän oýun dartgynly bäsleşige öwrülmegini dowam etdirýär.
Garşydaşlaryň ballary deň bolmagynda galýar, hasap - 3:3. Olaryň arasyndaky soňky oýnalan partiýa 46-njy göçümde tamamlandy diýip, championat.com habar berýär.
Bu gezek häzirki dünýä çempiony, hytaýly grossmeýster ak mallar bilen oýnady.
Bäsleşigiň birinji oýnunda dünýä çempiony hindistanly garşydaşyny ýeňipdi. Şondan soňra Gukeş bäsleşigiň üçünji oýnunda garşydaşyna üstünlikli jogap berdi, ondan soňky oýunlar bolsa deňme-deňlikde tamamlanyp gelýär. Şeýle-de bolsa, duşuşyklardaky dartgynlylyk artýar. Liženi ýeňmäge ymtylyşynda, hindistanly dalaşgär töwekgelçilikli ýalňyşlyklara ýol berýär. Muňa garamazdan, hytaýly grossmeýstere hemişe garşydaşynyň ýalňyşlyklaryndan peýdalanmak hem-de artykmaçlyk gazanmak başartmaýar, ol şeýle mümkinçilikleri elden gidirýär.
Muňa garamazdan, hünärmenler Din Liženiň her oýunda ynamly görünýändigini bellediler. Çaklamalara görä, taý-breýk görnüşi boýunça oýnamaly bolsa, artykmaçlyk hindi küştçüsiniň däl-de, çalt formatda has gowy çykyş edýän Diniň tarapynda bolar.
Din Ližen geçen ýyl russiýaly Ýan Nepomnýaşşiý bilen geçirilen çempionlyk oýnunda ýeňiş gazanypdy.
Bäsleşigiň ýedinji duşuşygy 3-nji dekabra meýilleşdirilýär. Onuň baýrak gaznasy 2,5 million dollardyr.
