Singapurda dünýäniň küşt täji ugrundaky geçýän ýaryşyň ilkinji duşuşygynda 32 ýaşly dünýä çempiony, hytaýly grossmeýster Din Ližen 18 ýaşly hindi küştçüsi Gukeş Dommarajudan üstün çykdy.
Birinji oýunda Din Ližen küştüň gara mallary bilen oýnady we 42-nji göçümde ýeňiş gazandy.
Dommaraju şu ýyl dalaşgärleriň ýaryşynda ýeňiji bolup, häzirki çempion bilen oýnamak hukugyny gazandy. Ol şonda dalaşgärler ýaryşynyň iň ýaş ýeňijisi bolmagy başarypdy.
Din Ližen geçen ýyl ýaryşda russiýaly Ýan Nepomniýaşini ýeňip, dünýä çempiony boldy. Şeýle-de bolsa, şondan soň hytaýly grossmeýsteriň netijeleri peselip başlady. Ol häzirki wagtda FIDE dünýä reýtinginde 23-nji ýerde durýar.
Oýnuň başynda Gukeş artykmaçlygy ele aldy, ýöne birnäçe düýpli ýalňyşlyklardan soň, artykmaçlygy garşydaşyna berdi.
Çempionlyk ady ugrundaky ýaryşyň birinji duşuşygy 2010-njy ýyldan bäri ilkinji gezek netijeli tamamlandy. Şeýle netije soňky gezek Weselin Topalowyň (Bolgariýa) Wişwanatan Anandany (Hindistan) ak mallar bilen ýeňmegi bilen hasaba alnypdy. Şeýle-de bolsa, şonda bu oýun hindistanly küştçi üçin 6.5-5,5 hasabynda ýeňiş bilen tamamlanypdy. Şondan bäri sekiz titul oýny oýnaldy, bularyň hemmesi deňme-deň tamamlandy.
2,5 million dollar baýrak gaznasy bolan ýaryşa gatnaşyjylar 14 oýna çenli nusgawy küşt görnüşini oýnarlar, deňme-deň utuk toplasalar, grossmeýsterler taý-breýk görnüşi boýunça ýaryşarlar diýip, rbc.ru ýazýar.
