Katalonlaryň "Barselonasynyň" we Ispaniýanyň milli ýygyndysynyň oýunçysy Lamin Ýamal Birleşen Milletler Guramasynyň Çagalar gaznasynyň (ÝUNISEF) ilçisi boldy. Bu barada guramanyň metbugat gullugy habar berdi.
Bellenilişi ýaly, futbolçy tölegsiz esasda guramanyň ilçisi boldy.
"Barselona" ÝUNISEF bilen işjeň hyzmatdaşlyk edýär we bilelikdäki çäreleri köp geçirýär. Ýamal entek bäbek wagty bu wakalaryň birine gatnaşypdyr. BMG-niň Çagalar gaznasy üçin klub 2007-nji ýylda ilkinji toparyň futbolçylarynyň suratlary bilen haýyr-sahawat senenamasyny çykardy: bu senenamalaryň satuwynyň 50%-i guramanyň ösmedik ýurtlarda amala aşyran taslamalary üçin ÝUNISEF-e iberildi. Bu çagalaryň hukuklaryny öňe sürmek we has gowy mümkinçilikler bilen üpjün etmek maksatly amal edildi. Şol waka üçin düşürilen suratlaryň arasynda Lionel Messiniň bäbejik Ýamaly ýuwundyrýandygyny görkezýän suratlar bar.
Lamin şol wagt hatda alty aýlyk hem däldi diýip, championat.com ýazýar.
