Astanada geçirilen Sambo boýunça 49-njy dünýä çempionatynda Türkmenistandan baran türgenler umumylykda alty medal gazandylar - bir altyn, iki kümüş we üç bürünç. Dünýä çempionatyna 80 döwletden 470 sany türgen gatnaşdy, dürli kategoriýalarda medallaryň 31 toplumy goýuldy diýip, "Türkmenistan: Altyn asyr" elektron neşiri habar berýär.
Türkmenistanyň düzüminde ýeke-täk altyn medaly Muminjan Arzykulow 71 kg-a çenli agram derejede söweş sambosy boýunça gazandy. Türkmen türgeniniň bu üstünligi barada TmCars şu habarynda aýdypdy.
Sambo boýunça dünýä birinjiliginde kümüş medallara - Bägül Nuryýewa (50 kg-a çenli) we Sabina Agajanowa (80 kg-dan ýokary). Olar söweş sambosy boýunça çykyş etdi.
Bürünç medallara Zarina Abdyrahmanowa (54 kg-a çenli), Gülzada Jorakulyýewa (72 kg-a çenli) eýe boldy. Olaryň ikisi hem söweş sambo boýunça çykyş etdi. Ýene bir bürünç medaly 71 kg-a çenli agram derejede sport sambosy boýunça Kambar Umarow aldy.
Ýatlatsak, sambo boýunça indiki ýubileý 50-nji dünýä çempionaty 2025-nji ýylda Aşgabatda geçiriler. Astanada geçirilen FIAS kongresinde wekilleri Türkmenistanyň paýtagtyny 2025-nji ýylda kongresiň geçiriljek ýeri hökmünde kesgitlediler. Şeýle hem Halkara sambo federasiýasynyň prezidenti hökmünde Wasiliý Şestakowyň ygtyýarlyklary 2029-njy ýyla çenli uzaldyldy.
