NordPass gözleg kompaniýasy “123456” parolynyň henizem iň meşhur we gowşak parol bolup galýandygyny tassyklady. Bu sanlar toplumy NordPass tarapyndan eýýäm altynjy gezek düzülýän iň ýaramaz parollaryň sanawynda birinji orny eýeledi.
Kompaniýa tarapyndan geçirilen derňewde 200 sany giňden ýaýran parol hödürlendi we olary döwmek üçin gerek wagt, şeýle-de olary ulanýan ulanyjylaryň sany görkezildi.
Seljeriş üçin NordStellar bilen bilelikde maglumatlar ýygnaldy. Öwrenilen maglumatlar bazasynyň göwrümi 2,5 Tbaýt bolup, ol maglumatlaryň syzmagy we zyýanly programma üpjünçiliginiň işiniň netijesinde, şol sanda darknetde ogurlanan parollary öz içine alýar. Köp ýagdaýlarda şeýle maglumatlar elektron poçta salgylaryny saklaýar, bu hem gözlegçilere korporatiw we şahsy akkauntlary tapawutlandyrmaga mümkinçilik berdi.
“123456” paroly 3 milliondan gowrak akkauntda tapyldy. Ony döwmek üçin bir sekuntdan hem az wagt gerek. Ikinji we üçünji orunlary “123456789” we “12345678” eýeledi. “g_czechout” ýaly çylşyrymly parollar döwmek üçin 12 güne çenli wagt alýar, ýöne olaryň ulanylmagy-da ygtybarly hasaplanylmaýar.
Ýönekeý parollar, köplenç, olaryň ýatda saklamak üçin amatlydygy we ýeňildigi sebäpli, aýratynam, bir gezeklik akkauntlar üçin saýlanýar. Şeýle-de bolsa, hünärmenler şeýle utgaşmalaryň ulanyjylary uly töwekgelçiliklere sezewar edýändigini duýdurýarlar.
Howpsuzlygy ýokarlandyrmak üçin hünärmenler şu aşakdakylary maslahat berýär:
- Her bir akkaunt üçin özboluşly parol döretmek;
- Harplar, sifrler we ýörite belgiler bilen azyndan 20 nyşan ulanmak;
- Maglumatlaryň syzmagyny yzygiderli barlamak;
- Çylşyrymly utgaşmalary saklamak we döretmek üçin parollar menejerinden peýdalanmak.
Bu görkezmelere eýerip, şahsy maglumatlaryň gorag derejesini ep-esli ýokarlandyryp bolar.
