16-njy noýabrdan 17-nji noýabra geçilen gije Nýu-Ýorkda (ABŞ) garyşyk başa-baş söweş boýunça UFC 309 ýaryşy geçirildi. Onuň esasy wakalarynyň biri braziliýaly Çarlz Oliweýra bilen ABŞ-nyň wekili Maýkl Çendleriň arasyndaky rewanş söweşi boldy.
Söweş tutuş bäş raund dowam edip, Oliweýranyň eminleriň biragyzdan karar bermegi netijesinde ýeňiş gazanmagy bilen tamamlandy.
Braziliýaly söweşiji ilkinji dört raundyň dowamynda artykmaçlyga eýe boldy, ýöne bäşinji raundda Çendler gyzgalaň döredip bildi. Ol Oliweýrany birnäçe gezek silkindirdi, ýöne ony nokauta düşürip bilmedi. Netijede, Oliweýra ýeňiş gazandy.
Oliweýra bilen Çendleriň arasyndaky ilkinji söweş 2021-nji ýylyň maý aýynda UFC 262-de geçirildi. Şonda Çarlz ikinji raundda tehniki nokaut bilen ýeňdi.
Indi Çendleriň hasabynda garyşyk başa-baş söweşde 23 ýeňiş we dokuz ýeňliş bar. Oliweýranyň hasabynda 35 ýeňiş we 10 ýeňliş bar, onuň ýene bir söweşi geçirilmedik diýlip hasaplandy.
