16-njy noýabrdan 17-nji noýabra geçilen gije Nýu-Ýorkda garyşyk başa-baş söweş boýunça UFC 309 ýaryşy geçirildi. Agşamyň esasy wakasynda agyr agramda çempion Jon Jons bilen bu agramda öňki çempion Stipe Mioçiç duşuşdy. Söweş üç raund dowam edip, Jon Jonsuň nokaut arkaly ýeňmegi bilen tamamlandy.
Ýeňişden soň Jons öz çempion guşagyny ABŞ-nyň täze saýlanan Prezidenti Donald Trampa berdi. Söweşiji agyr agramda UFC-niň çempion titulyny ilkinji gezek gorady. Jons professional ringde 2008-nji ýyldan bäri çykyş edýär. Jon Jonsuň hasabynda garyşyk başa-baş söweşde 27 ýeňiş bilen bir ýeňliş bar. Mioçiçiň hasabynda bolsa 20 ýeňiş we dört ýeňliş bar.
Şeýle-de, Jons öz ýeňşini Trampyň tansy bilen baýram etdi.
Ýaryşyň ýene bir esasy wakasynda ýeňil agram derejesinde braziliýaly Çarlz Oliweýra emin agzalarynyň karary bilen amerikaly Maýkl Çendlerden üstün çykdy.
