Kanadanyň Wildfire Innovations Inc. kompaniýasy RainStream atly ykjam ýangyn diňini döretdi. 30 metr beýiklikdäki teleskopiki gurnama tokaý ýangynlaryny söndürmek, binalary çalt goramak we ýangyna garşy päsgelçilikleri döretmek üçin niýetlenendir.
Diňi agramy bir tonna töweregi bolan islendik ulagyň kömegi bilen daşap bolýar - bu ony dürli ilatly ýerlere eltmäge mümkinçilik berýär.
RainStream töwerekde ýangyn söndüriji duman döretmek ýa-da suw akymyny bir tarapa gönükdirmek üçin 360 gradus aýlanyp bilýän pürküji kelle bilen enjamlaşdyrylandyr. Minara 3,25-8 gektar meýdana “ýagyş ýagdyrmaga” ukyply, şol bir wagtda ony iki adamdan ybarat toparyň tagallasy bilen 40 minutdanam az wagtda gurnap we işe girizip bolýar. Dizel ýangyjynyň bir bagy 40 sagatlap işlemek üçin ýeterlikdir.
“Adaty prosedura “suw diwaryny” döretmek we gorag dumanyny üpjün etmek üçin köp sanly RainStreams-y ilatly ýerleriň ýa-da möhüm infrastrukturanyň yk tarapynda ýerleşdirmekden ybaratdyr. Şeýle-de bolsa, ýangyn söndüriş işlerine goldaw bermek üçin gurnama islendik ýerde we islendik wagtda ýerleşdirilip bilner " - diýip, Wildfire Innovations-yň baş direktory Rolf Wensel gürrüň berdi.
Kompaniýa diňleriň önümçiligine şu ýyl başlamagy meýilleşdirýär, 2025-nji ýylyň ýazynda bolsa alyjylara ugradyp başlar. Şeýle hem, RainStream-iň stasionar görnüşi işlenip düzülýär, bu nebiti gaýtadan işleýän zawodlar we ýangyn howpy ýokary bolan beýleki ýerlerde ýerleşýän desgalary goramak üçin awtomatiki usulda işjeňleşdirilip we uzakdan dolandyrylyp bilner.
