UFC-niň ýolbaşçysy Dana Uaýt promouşeniň köne nusgadaky ellikleri ulanmaga gaýdyp gelýändigini resmi taýdan habar berdi. Köne nusga geçiş eýýäm 16-njy noýabrdan 17-nji noýabra geçilýän gije Nýu-Ýorkdaky “Medison Skwer Garden” arenasynda geçiriljek UFC 309 ýaryşynda bolar.
“Ilkibaşda biz bu ellikleri göze şikes ýetmeginiň öňüni almak üçin döretdik, biziň gowy niýetimiz bardy, siz muny bilýäňiz. Ýöne onuň netije bermändigi barada şikaýatlar köp boldy. Adamlar bu elliklerden nägilediler. Şonuň üçin men karara geldim – esasy operasion müdirimiz Lourense jaň etdim we diýdim: “Men ellikleri çalyşýaryn. Men täze ellikleri isleýärin, köneleri bolsa yzyna gaýtarýaryn”. Şonuň üçin, hawa, indi bu köne ellikler bolar. Täze ellikler indi köne boldy” – diýip, Uaýt metbugat maslahatynda aýtdy.
Täze nusgadaky ellikler UFC-ä 2024-nji ýylyň iýun aýynda girizildi. Şeýlelikde, olaryň ulanylyşy alty aýdan hem az dowam etdi.
