“Formula-1” çempionatynyň on toparynyň we ýigrimi ýaryşa gatnaşyjysynyň ählisi 2025-möwsümi başlamazdan öň bilelikdäki tanyşdyryş çäresini geçirer. Ol 18-nji fewralda Londonda geçiriler we çempionatyň 75 ýyllyk ýubileýine bagyşlanar diýip, “patyşalyk ýaryşlarynyň” resmi saýtyna salgylanyp, RIA Nowosti habar berýär.
“Formula-1-iň” prezidenti we ýerine ýetiriji müdiri Stefano Domenikali bu wakanyň ähmiýetini belläp, taryhda ilkinji gezek muşdaklaryň täze möwsümiň açylyşy we ýubileý mynasybetli ýörite gurnalan bir çärede ýaryşa gatnaşyjylaryň we toparlaryň ählisini görüp biljekdigini belledi.
Öň, Halkara awtomobil federasiýasy (FIA) “Formula-1-iň” täze möwsüminiň 2025-nji ýylyň 14 – 16-njy martynda geçiriljek Awstraliýanyň Gran-prisinden başlajakdygyny habar berdi. Geçen iki ýylda bolşy ýaly, geljekki çempionatda hem 24 ýaryş geçirmek meýilleşdirilýär. Möwsümden öňki synaglar 26 – 28-nji fewralda Bahreýnde geçiriler.
