Halkara boks federasiýasy (IBF) boýunça agyr agramda dünýä çempiony britaniýaly Daniel Dýubua watandaşy we öňki dünýä çempiony Entoni Joşuadan wagtyndan ir üstün çykyp, ilkinji gezek tituly gorady.
Söweş Londondaky "Uembli" stadionynda geçirildi (96 müň petegiň ählisi satyldy) we bäşinji raundda nokaut bilen tamamlandy. Gapma-garşylygyň dowamynda Joşua ençeme gezek nokdaun ýagdaýyna düşdi.
Ilkinji nokdaun birinji raundyň soňky sekuntlarynda Joşuanyň äňine takyk urgynyň urulmagy bilen boldy. Joşua diňe dördünji raundda işjeňleşip başlady, ýöne garşydaşyna agyr urgy ýetirip bilmedi. Bäşinji raundda Joşua Dýubuany silkindirip bildi, ýöne Dýubuanyň garşydaşyň äňine nobatdaky urgusy söweşe nokat goýdy. Joşua emin sanap gutarýança ýerinden turup bilmedi.
Dýubuanyň hasabynda indi 22 ýeňiş we iki ýeňliş bar. 2012-nji ýylyň Olimpiýa çempiony bolan Joşua üçin bu ýeňliş dördünji boldy, onuň hasabynda 28 ýeňiş bar.
Öň, titula absolýut dünýä çempiony ukrainaly Aleksandr Usik eýeçilik edýärdi, ýöne ol Taýson Fýuri bilen rewanş we goragy geçirmegiň mümkin däldigi sebäpli guşagy boşatdy.
