BHP dag magdan gazyp çykarýan kompaniýa emeli aň (AI) tehnologiýalarynyň ösdürilmegi mise bolan islegiň ep-esli ýokarlanmagyna getirer we bu metalyň ýetmezçilik meselesini has hem ýitileşdirer diýip çaklaýar. Seljerijiler 2050-nji ýyla çenli mise bolan islegiň ýylda 3,4 million tonna artyp biljekdigini çaklaýarlar diýip, Financial Times habar berýär.
Mis maglumatlary gaýtadan işleýiş merkezlerinde ulanylýan kabeller üçin möhüm materialdyr. Bu metal sowadyş ulgamlarynda we maglumat merkezlerinde prosessorlary birikdirmek üçin hem zerurdyr.
BHP 2050-nji ýyla çenli dünýäde mise islegiň 52,5 million tonna ýetjekdigini çaklaýar we bu 2021-nji ýylda hasaba alnan 30,4 million tonnadan ep-esli ýokarydyr. Kompaniýanyň baş maliýe direktory Wandita Pant häzirki wagtda mise islegiň 1% -inden hem az bölegini tutýan maglumat merkezleriniň asyryň ortalaryna 6-7% sarp etjekdigini aýtdy.
Soňky ýyllarda mis ýetmezçiliginiň we täze känleriň haýal depginde açylýandygynyň fonunda bu metalyň bahasy ýokarlandy. Şeýle hem, hünärmenler misiň her tonnasynyň bahasynyň 40 müň dollara çenli ýokarlanjakdygyny çaklaýarlar, sebäbi islegiň we üpjünçiligiň deňagramsyzlygy hasam aýdyň ýüze çykar.
AI tehnologiýalary we maglumat merkezleri ýakyn onýyllykda mise isleginiň esasy hereketlendirijisi bolar.
