Las-Wegasdaky (ABŞ) “Sfera” arenasynda UFC 306 ýaryşy geçirilip, onuň esasy wakasy iň ýeňil agramda häzirki çempion Şon O’Melli bilen dalaşgär Merab Dwalişwiliniň arasyndaky titul söweşi boldy. Söweş tutuş bäş raund dowam edip, emin agzalarynyň biragyzdan karary netijesinde Merab Dwalişwiliniň ýeňmegi bilen tamamlandy. Netijede, ol iň ýeňil agramda UFC-niň çempion guşagynyň täze eýesi boldy.
Mundan öň O’Melli mart aýynda söweşip, Marlon Weradan üstün çykdy. Amerikaly söweşijiniň hasabynda 18 ýeňiş, iki ýeňliş bar, onuň gatnaşmagynda geçirilen ýene bir söweş netijesiz tamamlandy.
Dwalişwili bu söweşden öň 10 söweşden ybarat ýeňişli tapgyrdady. Onuň hasabynda 17 ýeňiş we dört ýeňliş bar. 33 ýaşly Merab UFC-niň Gruziýa wekilçilik edýän ilkinji çempiony boldy.
Belläp geçsek, UFC 306 liganyň taryhynda iň girdejili ýaryş boldy. Bu barada promouşeniň başlygy Dana Uaýt metbugat maslahatynda habar berdi. Onuň aýtmagyna görä, “Sfera” arenasyndaky 16 024 ornuň ählisi satyldy. Bu ýaryş üçin petek satuwyndan gazanylan umumy girdeji 22 mln dollar boldy we bu UFC-niň taryhynda rekorddyr. Şeýle-de, liganyň taryhynda bir ýaryş üçin iň köp janköýer atributikasy satyldy.
