Amerikaly Maýkl Çendler 16-njy noýabrda Nýu-Ýorkda geçiriljek UFC 309 ýaryşynda braziliýaly Çarlz Oliweýra bilen duşuşar. Bu barada MMA Junkie habar berýär.
Çendler iki ýyllap diýen ýaly iki agram derejesinde UFC-niň öňki çempiony Konor Makgregor bilen söweşmek üçin garaşdy, ýöne irlandiýalynyň taýýar däldigi sebäpli söweş ençeme gezek soňa goýuldy. UFC-niň ýolbaşçysy Dana Uaýt 38 ýaşly Çendleriň garaşmakdan ýadandygyny we başga bir garşydaş bermegi sorandygyny aýtdy.
Çendler bilen Oliweýra 2021-nji ýylyň maý aýynda ýeňil agramda UFC-niň erkin çempion tituly ugrunda söweşipdi. Bu duşuşyk ikinji raundda braziliýalynyň ýeňiş gazanmagy bilen tamamlandy. 2022-nji ýylyň oktýabr aýynda Oliweýra russiýaly Islam Mahaçew bilen söweşde titulyny ýitirdi.
34 ýaşly Oliweýranyň hasabynda MMA-da 34 ýeňiş we 10 ýeňliş bar, ýene bir söweş geçirilmedik diýlip hasaplanyldy.
Soňky gezek 2022-nji ýylyň noýabrynda söweşen Çendleriň hasabynda bolsa 23 ýeňiş we sekiz ýeňliş bar.
