Meksikanyň Miçoakan ştatynda Iuasio arheologiki zolagynda ýerleşýän 1100 ýyllyk piramidanyň bir bölegi ýykyldy. Weýrançylyga sebitdäki adatdan daşary howa bilen utgaşyp gelen güýçli ýagyş sebäp boldy diýip, Daily Mail habar berýär.
Meksikanyň Milli antropologiýa we taryh instituty (INAH) ýumrulmanyň piramidanyň günorta fasadynyň merkezi böleginde bolup geçendigini aýtdy. Ýokary temperaturadan we ondan soňky gurakçylykdan ýaňa jaýryklar emele gelip, şolardan akan suw desganyň içine aralaşypdyr.
Iuasio piramidasy purepeça halkynyň astekleriň imperiýasyna garşy alyp barýan göreşiniň nyşany bolmak bilen, möhüm medeni we taryhy ähmiýete eýe. INAH-yň habar bermegine görä, ýeten zyýanyň bahasyny kesgitlemek üçin zerur çäreler görlüp başlandy we ýerli häkimýetler ýadygärligi dikeltmek maksady bilen eýýäm serişde ýygnamaga girişdi.
