Portugaliýanyň milli ýygyndysynyň düzüminde 2016-njy ýylyň Ýewropa çempiony, 41 ýaşly goragçy Pepe “Instagramda” karýerasyny tamamlandygyny habar berdi.
Futbolçy ähli gazanan kuboklary bilen wideo ýerleşdirip, teswirde “Minnetdar” diýip ýazdy.
Pepe Braziliýada dünýä indi we futbol oýnamaga watanynda başlady. 2002-nji ýyldan Portugaliýanyň “Maritimu” we “Portu” toparlary üçin çykyş etdi. 2007 – 2017-nji ýyllarda Madridiň “Realynyň” oýunçysy boldy we onuň bilen üç gezek Çempionlar ligasynda ýeňiş gazandy. Soň “Beşiktaşa” geçdi, 2019-njy ýylda bolsa “Portu” gaýdyp geldi.
Pepe Portugaliýanyň milli ýygyndysy üçin 2007-nji ýyldan bäri 141 oýna gatnaşyp, sekiz gol geçirdi we Ýewropa çempionatynda (2016) hem Milletler ligasynda (2019) ýeňiji boldy. Germaniýada geçen Ýewropa çempionatynda Pepe taryhda iň uly ýaşly oýunçy bolup, wengriýaly derwezeban Gabor Kiraýyň rekordyny täzeledi.
