Abu-Dabide (BAE) garyşyk başa-baş söweş boýunça UFC on ABC 7 ýaryşy tamamlandy. Ýeňil agramda (70 kg çenli) öňki wagtlaýyn çempion amerikaly Toni Fergýuson watandaşy Maýkl Kýeza bilen duşuşdy. Söweş birinji raundda Maýkl Kýezanyň demikdiriji usul arkaly ýeňmegi bilen tamamlandy.
Kýezadan ýeňilmegi 40 ýaşly Fergýuson üçin yzygider sekizinji ýeňliş boldy. Mundan öň, ol Jastin Getjiden, Çarlz Oliweýradan, Beneil Dariuşdan, Maýkl Çendlerden, Neýt Diasdan, Bobbi Grindan we Peddi Pimblettden ýeňildi.
Netijede, Fergýuson yzygider ýeňlişleriniň sany boýunça absolýut antirekord goýdy.
Soňky gezek Toni 2019-njy ýylda UFC 238-de ýeňiş gazanypdy. Şonda ol Donald Serroneden tehniki nokaut bilen üstün çykdy.
UFC on ABC 7-niň esasy söweşinde russiýaly Umar Nurmagomedow amerikaly Kori Sendhagen bilen duşuşdy. Söweş bäş raund dowam edip, russiýalynyň emin agzalarynyň biragyzdan karar bermeginde ýeňiş gazanmagy bilen tamamlandy.
Nurmagomedow yzygider 18-nji ýeňşini gazandy, ol ýeke gezek hem ýeňilmedi.
