Serbiýaly tennisçi, dünýäniň ikinji raketkasy Nowak Jokowiç Pariždäki Olimpiýa ýaryşynyň ýeňijisi boldy. Ýaryşda birinji belgi bilen ýerleşdirilen Jokowiç finalda dünýäniň üçünji raketkasy, ispaniýaly Karlos Alkarasy iki setde 7:6 (7:3), 7:6 (7:2) hasabynda utdy. Duşuşyk üç sagat töweregi dowam etdi.
Jokowiç bilen Alkarasyň arasynda şahsy duşuşyklarda hasap serbiýalynyň peýdasyna 4-3 boldy.
Belläp geçsek, mundan öň şu möwsümde 21 ýaşly Alkaras “Uimbledonyň” finalynda 37 ýaşly Jokowiçi üç setde utdy.
Jokowiç üçin Fransiýadaky Oýunlar karýerasynda bäşinji boldy, oňa ilkinji gezek Olimpiýa altyn medalyny gazanmak başartdy. Öň, ol 2008-nji ýylda Pekinde geçirilen Olimpiadada ýekelikde bürünç medala eýe boldy. Alkaras Olimpiada ilkinji gezek gatnaşdy.
Jokowiç “Uly tuwulga” ýaryşlaryndaky ýeňişleriniň sany boýunça rekord eýesidir (24). Alkarasyň hasabynda şeýle tituldan dördüsi bar – “Uimbledon” (2023, 2024), “Rolan Garros” (2024) we US Open (2022).
